ACT NOW! i raitim na Wantok Niuspepa i pablisim lo Tok Pisin 25th Julai 2024

Long taim i no gat gutpela plen long Distrik level, bai i no gat kwaliti helt na edukesen sevis long Papua Niugini.

Risets bilong ACT NOW i soim olsem tupela yia bihain long las nesenel ileksen, wanpela kwata tasol o 25 % bilong ol Distrik i tokaut long faiv-yia divelopmen plen bilong 2023 – 2027.

Ol Distrik Divelopmen Plen 2023 -2027

Lonsim plen tasol i no kamap yet - 17 %

I gat Plen – 7%

No gat Faiv Yia Plen – 75%

Long taim i gat gutpela plen bai i gat kwaliti sevis i kamap, olsem na i no gutpela long lukim tude ol Distrik i save K20 milien long wan wan yia long Service Improvement and Infrastructure, tasol planti bilong ol i no gat klia plen long rot bilong yusim gut dispela mani. Bikos taim i no gat plen, bai ol impoten sevis i no inap go kamap long ol ples, na ol pipel na komyuniti bai pilim bikpela pen.

Planti Distrik i no gat gutpela plen olsem na i no gat transperensi na akauntabiliti. Ol pablik na ol ki gavman institusen i no klia long menesmen, rot bilong sekap, na olsem wanem ol i yusim dispela mani bilong Distrik.

Long Jun 2023, ACT NOW i putimaut DDA Watch website. As bilong dispela website em long ol pablik i ken lukim infomesen bilong Distrik na luksave long wanem kain sevis i kamap long Distrik bilong ol. Tasol sori tru. Ol 7-pela Distrik tasol i putimaut plen bilong ol long ol pablik i ken lukim, na ol 75 Distrik i no tokaut yet long plen bilong 2023 – 27. I gat 96 Distrik olgeta.  Na tu, i no gat wanpela Distrik i tokaut long enuel baset bilong 2023 o 2024. 

ACT NOW i luksave long 21 Distrik husat i bin lonsim plen bilong ol, mipela i singaut long ol i putimaut tu na bai ol pipel bilong ol i ken lukim. Long wankain taim tu, mipela i askim Dipatmen bilong Fainens long no ken givim mani long ol dispela Distrik husat i no gat plen.

Narapela hevi antap tu long no gat plen, ACT NOW i painim aut olsem 40 Distrik tasol i givim ripot o akwitel bilong hamas mani ol i spendim, long Dipatmen bilong Implementesen na Rurel Divelopmen (DIRD) long las 12-pela mun. Ol 24 akwitel ripot i bilong hamas mani ol i spendim long 2023 na 2022, na narapela 18 i givim ripot bilong ol arapela yia.

Dispela pasin bilong no gat akwitel i kamapim bikpela askim - ol i yusim mani long Distrik level olsem wanem?

Em i risponsibiliti bilong Gavman long stretim ol dispela hevi nau yet na bai gat gutpela sevis deliveri bihainim stretpela pasin, na dispela pasin bai kamapim trupela divelopmen. Ol pablik tu i mas opim maus na toktok strong long ol Memba bilong Palamen na ol gavman opisa long mekim stret wok bilong ol.

ACT NOW! i toksave long olgeta manmeri long lukim DDA Watch website long painim aut infomesen long Distrik bilong ol na yusim scoring na comment function, long autim tingting bilong ol.

Singaut long Eksen:

• Citizen Engagement: Mipela singaut long olgeta sitisen long toktok wantaim ol DDA na lukim olsem i gat transperensi, akauntabiliti, na strongim stretpela pasin bilong mekim ol wok.
• District Planning: Olgeta DDA i mas putimaut 5-yia divelopmen plen na putim dispela plen long ol pablik tu i lukim.
• DSIP Accountability: Ol DDA i mas putimaut ful akwitel ripot bilong DSIP na DIP na bai ol pablik i gat bilip gen long wok bilong ol.
• Budget Transparency: Olgeta Distrik i mas putimaut baset bilong ol we i soim ples klia rot ol bai yusim mani long en.

Yumi wok wantaim na strongim ol Distrik na komyuniti bilong yumi long gro long stretpela pasin.